ХОМТОК, ЯШИЛ ОПЕРАЦИЯЛАР – ўсув даврида ток тупининг барча яшил қисмлари бўйича ўтказиладиган операциялар (хомток, чилпиш, чеканка, ҳалқалаш, новдаларни тараб боғлаш, пахтабарг ва ҳ. к.). Энг асосийлари хомток, чеканка ҳисобланиб, хомток кузги ва баҳорги ток кесишнинг давоми ҳисобланади. Асосан 2 марта: шўра хомток (апрел охирлари ва май бошларида янги новдалар 25-30 см. ўсган ва уларда шўралар пайдо бўлган вақтда), ғўра хомток (ток гуллагандан сўнг, ғўралар мошдек бўлган, новдалар кўпайиб ток тупи қалинлашган даврда) қилинади. Чеканка эса, август ойида новда¬лар пишиб етилишини тезлаштириш мақсадида қилинади.