ОЛМА, олма дарахти – раънодошларга мансуб уруғмевали дарахт. 33, жумладан, Ўзбекистонда 8 тури учрайди. Дунёда 10000 дан ортиқ, жумладан, Ўзбекистонда 400 га яқин навлари мавжуд. О. мевали дарахтлар ичида майдони ва ҳосилдорлиги бўйича биринчи ўринда. Пайванд қилинган кўчатлари 3-10-йилда ҳосил беради, 70 йил ва ундан ортиқ умр кўради. Асосий турлари: ўрмон О., шарқий ёки кав¬каз О., олхўрибарг О., Хитой О., Сиверс О., Недзвецкий О., резавор О., Сибирь О., паст бўйли ёки карлик О. Ўзбекистонда О. апрелда гуллай¬ди. Барглари оддий, бутун, турли шакл ва катталикда. Гули 5 бўлакли, оқ, пушти, баъзан қизил. Меваси навига қараб июн-сентябрда пиша¬ди, турли ранг ва шаклда. Таркибида 9-13% қанд, олма кислотаси, пек¬тин, темир, А, В, С витаминлари ва ҳ. к. бор. Янгилигича ейилади, кури-тилади, консерва қилинади ва ҳ. к. О. пайвандлаш, пархишлаш йўли би-лан, шунингдек, илдиз бачкиси ва уруғидан кўпайтирилади. О. навлари пишиш вақтига қараб ёзги (эртаги), кузги (ўртаги) ва қишки (кечки)га бўлинади. Ўзбекистонда Афросиёби, Боровинка Ташкентская, Вайнсеп, Делишес, Голден делишес, Джонатан, Корей, Первенец Самаркан¬да, Р. Симиренко, Розмарин белий, Саратони, Старкримсон, Ҳосилдор каби навлари районлаштирилган. О. нинг кучли ўсувчи пайвандтагдаги кўчатлари 8х6 м, 8х7 м, суст ўсувчи пайвандтагга уланганлари 5 х 3 м, 6 х 4 м оралиқда экилади